Далан настай эмгэний учралыг аймаг даяараа ойлгохгүй муу хэлж, гутарч шаналж байтал бэр нь харин тасхийсэн үг хэлснээр, эмгэн хайрынхаа төлөө тэмцье гэж зориглоно.

Дөрөвдүгээр ангийн арван хоёр настай гурван нусгай, шинэ багшид дурлаад хайрын захиа бичээд гурвуулаа зэрэг нэрээ бичиж, багшдаа алгадуулж, эцэгтээ зодуулж, сургууль даяар онигоонд орно. Гэвч нэг нь хайраасаа буцахгүй.

Хийж буй наймаанаас эхлээд бүх алхам нь бүтэлгүй, үүндээ гутраад балгадаг болж яваа, сум даяар эрхийн балай гэж хэлүүлсэн залуу танилцаад аравхан хоносон гадаад бүсгүйтэй гэрлэлтээ батлуулж дуулиан тарина. Бүгд элэг доог болгож буйг батлах мэт, холын бэр залууг хаяад нутаг буцна. Гэтэл туужийн төгсгөлд бүсгүй нутаг буцаагүй, залууг хайрласаар л байсан болж таарна.

Энэ мэт өөр өөр өнгө төрх бүхий дурлалын гэгээлэг учралууд болоод, хүмүүний содон сонин араншин, хэн ч үнэмшимгүй сайхан сэтгэл байдаг тухай өгүүлсэн бүтээлүүд эл тууж, өгүүллэгийн түүвэрт бий.