Уг ном нь Хууль Зүйн Яам, Дэлхийн банкны шүүх эрх зүйн шинэчлэлт төслөөс хэрэгжүүлсэн сургалтын хөтөлбөрийн дагуу зохиогдсон бөгөөд дагнасан шүүхийн тогтолцоо, үйл ажиллагааг боловсронгуй болгоход чиглэсэн буюу захиргааны хэрэг хянан шийдвэрлэх ажиллагааны зарим үе шат, ойлголтыг тодорхой болгох зориулалт бүхий эерэг өөрчлөлтүүдийг агуулжээ. Нөгөө талаар зохиогч энэ номоор захиргааны хэргийн шүүхийн эхний 2 жилийн практик үйл ажиллагаанд хөндлөнгөөс дүн шинжилгээ хийж, уг шүүхийн өмнө тулгамдаж буй зарим асуудлыг шийдвэрлэх онол- арга зүйн үндэслэлийг дэвшүүлэн тавьсан тул захиргааны хэргийн шүүхийн шүүгч, хуулийн байгууллагын ажилтнуудын ажил хэрэгт бага боловч тус нэмэр болно гэдэгт найдаж байна. Мөн захиргааны өмнө тулгарч буй шинэ тутам асуудлын нэг болох захиргааны хэрэг урьдчилан шийдвэрлэх ажиллагааны мөн чанар, онцлог, түүний хэрэгжих үйл явцыг дэлгэрэнгүй авч үзжээ.