Барилгын буурь, суурь сурах бичиг нь хөрсний механикийн онолын хэрэглээг тодорхойлсон үргэлжлэл болох бөгөөд янз бүрийн хөрсний нөхцөлд суурийн төсөл зохиож, барилга барих технологийн асуудлыг судлана. Өөрөөр хэлбэл хөрсний нөхцөлөөс хамааран суурийн төрлийг сонгох, хөрсийг сайжруулах, сонгосон суурийн бүтээцийг тооцоолж төсөллөх, суурь болон газар доорхи бүтээцийг гүйцэтгэх технологийг боловсруулж хэрэгжүүлэх асуудлуудыг хамааруулан судлана. Буурь, суурийг судлах явцад оюутнаас инженерийн геологи, хөрсний механик, барилгын механик, барилгын конструкци, барилгын үйлдвэрлэлийн технологи зэрэг салбар шинжлэх ухаантай танилцсан, энэ талын сайн мэдлэгтэй байхыг шаарддаг.