Тагтаа хэвлэлийн газраас уран зохиолын өндөр шүүлт шалгуураар сонгож хэвлэсэн шилмэл бүтээлүүдийн нэг нь энэхүү тэжээвэр зохиол юм. Богино өгүүллэг, өгүүллэг, тууж, роман, кино зохиол зэрэг хүүрнэл зохиолын бүхий л төрлөөр тэгшхэн бүтээн туурвисаар ирсэн Д.Норов зохиолчийн бүтээлээс энэ удаа өгүүллэг, туужуудыг нь шилэн хүргэж байна. Д.Норовын өгүүллэг, туужууд хүний дотоод сэтгэлийг төнхсөн нягт бичлэг, сэтгэлзүйн эрс тэс ялгарал, хүүрнэлийн баялаг чанараараа уншигчдад хүчтэй нөлөөлж, зохиолынхоо гүнд яв цав барьж чаддагаараа онцлогтой. Нэн ялангуяа туужууд нь түүний туурвилзүйн онцлогийг илэрхийлэх хөрс суурь нь юм. Д.Норов зохиолчийн хамгийн тулхтай зохиолууд туужийн хэлбэрээр бичигддэг нь санамсаргуй хэрэг биш болов уу. Энэ цагийн нэгэн гайхамшигт зохиолчийн туурвилзүйн ертөнц жирийн уншигчдын хувьд нууц хэвээр л байна. Тэр нууцаас энэ ном бага ч атугай хэлтэлж, хойчийн мэргэдэд нээхийн санаа төрүүлнэ хэмээн итгэнэ.