Монголын Бурханы шашинтны төв Гандантэгчэнлин хийдийн тэргүүн хамба Дэмбэрэлийн Чойжамц гуай бол Зонховын шашны гавжтан, үндэсний буддизм, уламжлалт зан суртлын төлөөх их үйлсэд өөрийгөө зориулсан хувраг төдийгүй манай нийгэм-төрийн нөлөө бүхий зүтгэлтэн билээ. Шашингүй коммунист дэглэмийн дотор төрж бойжих тавилантай үеийнхний нэг болох түүнд өсөх идэр наснаасаа бурханы номын ариун үйлст зүтгэх ховорхон боломж олдсон бөлгөө. Түмэн амьтны нэгэн дээр л тусах үүлэн чөлөөний нар мэт завшаан боломжийг эргэлзээгүй дөрөөлөн шашин номын үйлст нэгэн үзүүрт сэтгэлээр зүтгэсэн тэрээр Монголын Бурханы шашинтны Төв, Гандантэгчэнлин хийдийн хамбын үүргийг хүлээх болсноор хорь гаруй жилийг үдсэн байна. Энэхүү хориод жил нь нэг талаасаа шүтэх бишрэх эрх чөлөө нээгдсэн сайхан үе байсан нь ч бүх нийтийг хамарсан хямрал задрал дагуулсан бэрх он жилүүд байв. Басхүү бурханы шашин эргэн сэргэсэн нь гайхамшиг боловч олон шашин, янз бүрийн мөргөл шүтлэгтэй өрсөлдсөн, дотоодын зөрчилтэй амаргүй цагийн туулах учиртай болов. Олон түмний авгайлан нэрлэснээр 'Чой хамба' хэмээх Д .Чойжамц гуайн энэ номд янз бүрийн үед өгсөн ярилцлага, илтгэл айлдвар, шашин мөргөл хийгээд нийтийн ёс суртлын сэдвээр уншсан лекцүүд нь орсон болно.