Зөнч зүүдний мөн чанарыг танин мэдэж, өөрийнхөө дотоод хүч, эрчим энергийг хөгжүүлснээр далд ухамсраа ашиглах, зүүдээ удирдан түүний ертөнцөөр аялан агуу гайхамшгийг бүтээхийн зам харгуйг олох, үүд хаалгыг нь нээхийг чармайгчдын хичээл, зүтгэл оролдлогыг төгөлдөржүүлэхэд санаа сэдэл өгөхийг би номынхоо зорилго болголоо.

Зүүдийг хянаж удирдахын учир нь нэгдүгээрт, зүүд нойрны тод гэрэл буюу сэрүүнээс унтах, зүүдлэх, буцаж сэрэх үйл явц, тэдгээрийн завсрын үе шат, онцгой цэг, уулзваруудыг ухамсартайгаар даван туулах, хоёрдугаарт, зүүдний онцгой биеийг бий болгон түүнийгээ ердийн үед очиж чадахгүй тийм орчлон ертөнцөд хүссэн үедээ очиж, аялан явах үйлд ашигладаг болох, гуравдугаарт, зүүдний ертөнцүүдийг таньж мэдэх чадварыг эзэмших явдал юм хэмээн тус номонд өгүүлжээ.