Зохиолч К.С.Люис 1939 онд үлгэрийн сэдэвтэй ном бичиж эхэлсэн ч удалгүй цэрэгт татагдан дайнд яваад түр завсарлажээ. Тэрээр 1940 онд Мэри Нейланд бичсэн захиандаа анх Арслан, шулам, шүүгээ номынхоо тухай бичиж байв. Гэвч Ж.Р.Р.Толкин тэргүүтэй номын бусад нөхөдтэйгөө шинэ уран бүтээлийнхээ тухай хөөрөлддөг байсан Инклингс бүлгэмийнхэн тус зохиолыг хатуу шүүмжилснээс болж Люис анхны гар бичмэлээ юу ч үгүй шатааж байжээ.

Гэвч Нарниагийн товчоон цуврал ном амжилт олж дэлхий даяар олон мянган хувь борлогдож үүнээс санаа авсан уран зохиол, жүжиг, кино гэх мэт олон бүтээлүүд төрөн гарсан юм. Зохиолч К.С.Люис дэлхийн хүүхэд багачуудад нэгэн шинэ, агуу уудам үлгэрийн ертөнцийг бүтээн бэлэглэсэн юм. Арслан, шулам, шүүгээ бол даяарчлагдаж байгаа орчин цагийн хүүхдүүдэд зориулсан гайхалтай үлгэрийн ном мөн хэмээн олон судлаачид үздэг.

Жирийн дунд сургуулийн дөрвөн хүүхэд хуучин хувцасны шүүгээ рүү нуугдахаар ордог. Гэвч тэр хувцасны шүүгээ өөр ертөнц рүү нэвтрэх шидэт хаалга байжээ. Дөрвөн хүүхэд ийнхүү домгийн араатнууд, хүний хэлээр ярьдаг амьтад, ид шидтэнүүдийн Нарниа хэмээх ер бусын оронд очиж, тэндхийн амьдралыг өөрчилсөн түүхэн үйл явдлын гол баатрууд болно.