Гэрэл зурагчин Э.Эрдэнэбаярын “Амьдрал миний дуранд” номоос 1980-аад оны сүүл буюу социализмын төгсгөл үе, 1990-ээд он буюу Монголын нийгмийн шилжилтийн үе хийгээд улс төр, урлаг, спортын салбарынхан, эгэл хүмүүсийн амьдралтай танилцаж болохоос гадна хот, хөдөөгийн хүмүүсийн ахуй амьдрал, байгалийн үзэсгэлэнт дүр төрх, ёс заншил, соёл гээд амьдралын бодит түүхийг тольдоорой. Э.Эрдэнэбаяр нь Үндэсний мэдээллийн МОНЦАМЭ агентлаг, “Адмон” хэвлэлийн компанид мэргэжлийн гэрэл зурагчнаар тус тус ажиллаж байснаас гадна Монгол Улсын Ерөнхийлөгч Пунсалмаагийн Очирбатын 1995 онд Европын орнуудад хийсэн албан ёсны айлчлалын үеийн гэрэл зурагчнаар ажиллаж байсан туршлагатай. Тэрбээр “Ган Үзэгтэн' шагналтан мөн Монголын Гэрэл Зурагчдын Нэгдсэн Холбоо, АНУ-ын Гэрэл Зурагчдын Нэгдсэн Холбооны гишүүн юм. Олон жилийн хөдөлмөрөө шингээсэн уран бүтээлийн дээжээ ийнхүү өргөн барьж байна. Ташрамд дурдахад “Амьдрал миний дуранд” ном монгол, англи хэлээр хэвлэгдсэн тул гадаад дотоодын жуулчид, хүндэт зочдодоо бэлэглэхэд үнэт бэлэг болно.