"Эгэл ертөнц" ном /кино зохиол/-ийн гол агуулга нь хүүхэд залуучуудад амьдралын утга учрыг танин мэдэх, мөнгө эрх мэдэл, эд материал бус харин хорвоо ертөнцийн гайхамшигт мөн чанарыг ойлгон ухаарахад нь туслах зорилготой билээ. Энэхүү ном /кино зохиол/ нь хүүхэд залуучуудын сэтгэн бодох, төсөөлөн илэрхийлэх чадварыг хөгжүүлэхээс гадна цаашлаад Монголын болоод дэлхийн сонгодог бүтээлүүдийг шимтэн уншиж төсөөлөн дүрслэх, ойлгон хүлээн авах үндэс суурийг нь тавьж өгөхөөрөө ач холбогдолтой гэдгийг энд дурдахдаа таатай байна.

Уг бүтээлийг үргэлжилсэн өгүүлбэрийн хэв маягаар бичсэн бөгөөд кино зохиолын стандартын дагуу үйл явдал бүрийг нь тодорхойлон өгүүлж, мөн зохиолын агуулгыг дүрслэн харуулах (storyboard) зурагтай хослуулан хийснээрээ онцлогтой. Ирээдүйд аугаа их кино урлагийн салбарт хөл тавьж кино зохиол бичих, аль эсвэл найруулах, түүнд тоглох хүсэл мөрөөдөлтэй хүүхэд залуучуудад ч энэхүү ном /кино зохиол/ нь тэдний бүтээлч сэтгэлгээг хөгжүүлэх, улмаар мөрөөдөл, итгэл үнэмшлээ олж авахад нь тусална гэдэгт зохиолчийн зүгээс итгэлтэй байна.