Монголчуудын эртний өвөг дээдэс болох хүннү нарын төр улсын төв нь Архангай аймгийн Өлзийт сумын нутагт саяхан илэрсэн Луут хот байсан бөгөөд үүний эргэн тойронд хэдэн мянган булш оршуулга, төмөрлөг боловсруулалтын төвүүд байрлаж байжээ. Эдгээрийн дотор Архангай аймгийн Өгийнуур сумын нутагт орших Тамирын улаан хошууны оршуулгын цогцолбор 400 булштай тул ийм төрлийн дурсгалууд дотроо хамгийн том нь хэмээн судлаачид үздэг байна. Хэрэв Хайрхан сумын Гол мод ба Өндөр-Улаан сумын Гол мод-2 дурсгалуудад Хүннүгийн хаад, язгууртнудыг оршуулж байсан эртний ариун хориг онгонууд байсан бол энгийн ардууд төдийгүй овог аймгуудын ахлагч, дээдчүүлийг оршуулдаг хориг нь Тамирын Улаан хошуунд байсан хэмээн манай археологчид үздэг.