Библи бол сургаал сургамж, шүлэг магтуугаар баялаг түүхэн бичвэрийн хэлхээс агаад энэхүү хэлхээний гол дүр нь Бурхан хүн хоёр юм. Хорвоогийн түүхийг эл хоёр дүр хэрхэн туурвиж ирснийг цаг хугацааны дэс дараалалтай нь цөөн үгээр илэрхийлж, зураг будгаар чимэглээд эрхэм уншигч багачууддаа өргөн барьж байна. Бурханы сайхан сэтгэл түүхэн он цагийн туршид хэрхэн хувиршгүй бат цогц байсныг, түүнчлэн хүмүүний хандлага ганц хүний төдийгүй улс үндэстэн, дэлхий дахины хувь тавиланг хэрхэн эргүүлж ирснийг түүвэрлэн авч хураангуйлан эл номонд багтаажээ. Уншигч бүрийн итгэл сэтгэл, зөв хандлага Бурханы хаанчлалд их хувь нэмэр болдгийг ямагт санан урам аваарай.