Хэл гэдэг хүний амьдралд ус, агаар мэт хэрэгтэй. Алхам тутамдаа хэрэглэж явах хирнээ хэл гээчийн дүрэм зүй, бүтэц байгуулалтыг харин сонирхдог нь ховор. Зарим хүн зөв бичих дүрмийг хэлний дотоод зүйтэй хутган боддог. Хэлний зүй тогтол нь хэн нэгэн хэл шинжээчээс хамаарах бус, байгалийн хууль мэт өөрөө оршин байдаг бол зөв бичих дүрэм нь зохиомол зүйл юм. Хэл шинжлэл бол нарийн боловсорсон онолын ухаан. Онол ямагт уйтгартай, ойлгоход бэрхтэй санагддаг. Харин энэ удаад зохиогч тантай хэлний онолын талаар зүгээр л хоёр найз суугаад хууч хөөрч байгаа мэт, эсвэл болсон явдал, онигоо ярьж байгаа мэтээр саналаа чөлөөтэй солилцохыг зорьжээ.