Номын зохиогч Д.Баттогтох монгол цагаан толгойн 'А' үсгийн үгийн эхэн, дунд, адагт орох 3 дүрсийг ялимгүй хувиргаж, монгол цагаан толгойн үсгүүдийг бүрэн бүтээж, 'А' үсэгт үндэслэн үндэсний бичгээ бие даан үтэр түргэн, зөв цэгцтэй сурах анхны цагаан толгойг зохиожээ. Монгол үсгийн махбод, биеийг биежүүлж байгаа цөөн хэдэн дүрс зурлага, тэмдгүүдийн тусламжтайгаар монгол хэлнийхээ бүх авиаг тэмдэглэж чадах нь монгол бичгийн үсэг зүйн нэг онцлог, давуу тал болно. 'А' үсгийн толгой (титэм)-г ялимгүй хувиргах буюу гурван дүрс дээр цөөн зурлага, ялгах тэмдэг тэргүүтнийг нэмэн чимж хэрэглэхэд монгол цагаан толгойн бүх үсгүүд бүтэж байгааг ажиглан мэдэж болно.