Холын холд Цаст улсын хойно, Дорнын хаант улсад үзэсгэлэнт гүнж амьдран суудаг байжээ. Түүнийг харсан, түүний тухай сонссон хүн бүхэн шидэт гэгээн гэрлээр дүүрсэн мэт гайхалтай сайхан мэдрэмжийг авдаг байв. Харин хааны гүнжийг эхнэрээ болгох гэж бүх л дэлхийн хаан, хун тайж нар ирэн гуйдаг байжээ. Гэсэн хэдий ч гүнжийн сонгосон хүн хамгийн даруу бөгөөд эгэл нэгэн байхыг харсан хаан эцэг нь ихэд гайхширчээ. Тэр бол алс холын орны нэгэн ханхүү байсан юм. Хаан эцэг нь ямар учраас ийм сонголт хийх болсныг асуухад гүнж: -Эцэг минь, шийдвэрээ гаргахын өмнө би гэрлэхийг хүссэн хүмүүстээ асуулт тавьсан юм. Тэгээд тэднийг сонсоод хэн нь хамгийн дээд баялгийг эзэмшдэгийг ойлгосон юм гэж хариулжээ. Энэ хариултыг сонсоод гайхсан хаан эцэг нь: -Хайрт охин минь, надад тайлбарлаач, эд баялагт дээд, доод гэж байдаг гэж уу? Бас хамгийн дээд баялаг гэж юу юм бэ? гэж асуужээ. Ухаант гүнж хариуд нь: Доод баялаг гэдэг бол үнэт чулуу, алт, гоёмсог хувцаснууд, амттай хоол юм. Дунд баялаг гэдэг бол эрүүл чийрэг, хүч чадал ихтэй бие махбодь юм. Харин хамгийн дээд баялаг бол хайр энэрэл, мэргэн ухаан бас хамаг амьтанд тус болох сэтгэл юм. Яг энэ чанарууд миний сонгосон хүний зүрхэнд байдаг учраас биднийг хамт амьдрахыг зөвшөөрөөч гэжээ.