ХХ зууны эхэн үеийн Монголын түүхийн ээдрээ нугачаатай түүхийн салшгүй хэсэг, монголын сурвалжит сэхээтнүүдийн эх орноо гэсэн сэтгэл, ард түмнээ соён гэгээрүүлэхийн төлөө хичээл зүтгэл, эмгэнэлтэй хувь заяаг бүхэлд нь хамарч жирийн сэхээтний сэтгэгдэл, үнэлгээ, бодролоор энэ бэсрэг ном бүтээгджээ. Эрдэм ухаантай, бас хоёр төрийн нүүрэнд ном эрдэмд зүтгэсэн ийм чухал хүний маш бүдэг бүрхэг түүхийг олдсон мэдээ сурвалж, өөрөө бэдэрч мэдсэн сураг чимээ, ойлголт төсөөллийнхөө хүрээнд бодол эргэцүүллээр хачирлаж бичсэн эл ном уншигчдын сонирхол, таашаалд нийцнэ гэдэгт эргэлзэхгүй байна.