2024 оны Нобелийн утга зохиолын шагналтан Өмнөд Солонгосын зохиолч Хан Ган
“Хөвгүүн ирлээ” романдаа Кванжүгийн бослого хэмээх улс оронд нь өрнөсөн сэтгэл эмзэглэм түүхэн хэрэг явдлыг дэвсгэр болгож, тус явдалд өртсөн долоон өөр дүрийг сонгон хүүрнэсэн байдаг. Харин "Цагаан хоолтон" романдаа хүмүүний тэр дундаа гэр бүл, ойр дотнын хүмүүсийн нарийн нандин харилцаа, зөрчил тэмцэл, хайр болоод дур хүсэл зэрэг тэр болгон олонд илхэн байдаггүй авч хүний амьдралыг заримдаа орвонгоор нь эргүүлж дөнгөдөг сэтгэл зүйн асуудлыг онц сонирхолтой өгүүлснээрээ онцлог билээ.
Бид яагаад ирээдүйг бус өнгөрснийг санадаг вэ? Цаг хугацаа "урсана" гэж юуг ойлгох вэ? Бид цаг хугацаа дотор оршдог уу, эсвэл цаг хугацаа бидний дотор оршдог уу? Италийн физикч, зохиогч Карло Ровелли уг бүтээлээрээ дамжуулан уншигч биднийг цаг хугацааны мөн чанарын тухай асуултуудыг сонирхолтойгоор эргэцүүлэх боломжийг олгожээ. Түүний товч тодорхой төдийгүй ойлгомжтой хүүрнэсэн өнгө аяс нь харьцангуйн ерөнхий онол, квант механик, сансрын онол, термодинамик зэрэг ээдрээтэй, хэцүү ухагдахууныг хялбархан ойлгоход танд тусална.
Амжилтад хүрсэн хүмүүс ямар нийтлэг зан чанартай байдаг вэ? Тэдний гол философи нь юу юм бол? Чин хүсэл эрмэлзэл эгэл хүслээс юугаараа ялгаатай вэ? Бодол, төсөөлөл биднийг зорилгоо биелүүлэхэд хэрхэн нөлөөлдөг вэ? Эдгээр олон асуултын хариулт "Think and Grow Rich" номд бий. Амжилт, бүтэлгүйтэл, зорилго, бодол төсөөллийн хүч, мөнгөний ойлголт гэх зэрэг өргөн хүрээг хамарсан тус бүтээл анх 1937 онд хэвлэгдсэн байдаг. Зохиогч энэхүү номоо бичихдээ тухайн цаг үеийнхээ нөлөө бүхий 500 эрхмийг судлахад амьдралынхаа 20 гаруй жилийг зориулжээ.