Өсвөр насанд хүүхдийн өндөр 20%, биеийн жин 50% нэмэгддэг тул тэжээлийн бодисуудын хэрэгцээ хэд дахин ихсэдэг. Энэхүү хэрэгцээг хангахуйц тэжээллэг хүнс, хоолыг зөв зохистой хэрэглээгүйгээс хүүхдийн өсөлт хөгжил хоцорч, эрүүл мэндэд нөлөөлөн улмаар өвчинд өртөмгий болдог. Сүүлийн жилүүдэд хийсэн судалгаагаар бие бялдрын өсөлтийн хоцрогдолтой, хөгжил дутуу хүүхдийн тоо ихсэж байгаа нь сурагчид зөв зохистой хооллодоггүй, эрүүл мэнд, өсөлт хөгжилт хангалтгүй байгаа, тэдэнд зөв зохистой хооллолт, дасгал хөдөлгөөний талаар мэдлэг боловсрол олгох шаардлагатай байгааг харуулж байна. Энэ номонд зөв зохистой хоол, идэвхитэй хөдөлгөөний талаар дэлгэрэнгүй бичсэн болно.  

Сурагчид, оюутан залуусын хооллолт

'Зөв зохистой хооллож эрүүл амьдрах нь' номын энэ удаагийн ботид хүн бүрийн мэдвэл зохих хүний бие махбод, эрхтэн тогтолцоо, хоол боловсролт, хүнс, хоол, тэжээллэг бодисууд, хүнс хоолны өөрчлөлттэй холбоотой эмгэгүүд, халдварт бус өвчнүүд, зүрхний титэм судасны өвчин, чихрийн шижин, таргалалт, хорт хавдар зэрэг орчин үед хүн амын нас баралтын гол шалтгаан болж буй өвчнүүд тэдгээрээс сэргийлэх, хоол боловсруулах замын өвчнүүд, хүнс хоолоор дамжих өвчин, хүнс хоолтой холбоотой үүсдэг харшил бусад өвчнүүд тэдгээрээс сэргийлэх, хоол засал, мацаг, 50-с дээш настнууд эрүүл мэндээ хамгаалах, насанд хүрэгчид хөдөлгөөнийг эрхэмлэх зэрэг шинжлэх ухааны үндэслэлтэй мэдлэг олгох асуудлуудыг оруулсны дээр монгол уламжлалт хоол, дэлхийн хүмүүсийн зөв зохистой хооллодог дэвшилтэт аргууд, орчин үеийн монгол хүн зөв зохистой хооллохын тулд ямар эрүүл хүнсийг сонгон хэрэглэх, хор болох ямар хүнсний хэрэглээг багасгах, ямар хүнсийг хэрэглээнээс хасах гэх мэт зохистой хооллох мэдлэг боловсрол олгох асуудлуудыг багтаасан болно.  

Насанд хүрэгчдийн хооллолт 

Хүүхэд эхийн хэвлийд байхаас эхлээд төрсөн цагаас нь хүний амьдралын бүх үед зөв зохистой хооллох, эрүүл амьдралын дадал буюу идэвхтэй хөдөлгөөнийг эрхэмлэх, өвчнөөс сэргийлж биеэ чийрэгжүүлэх зэрэг эрүүл амьдралын чухал асуудлуудыг багтаасан, нийт хүн амд зориулсан 4 цуврал номын эхнийх буюу '2 хүртэлх насны хүүхдийг зөв зохистой хооллох' ном эхийн хэвлийд байхаас хүүхдийн эрүүл амьдрал эхлэх учиртай учраас эх нь жирэмсэн үеэсээ хоолоо яаж зөв зохицуулах, биеэ яаж арчлан хамгаалах, хүүхдээ төрөнгүүт ангир уургийг нь яаж амлуулах, хөхөө яаж хөхүүлэх талаар мэдлэг олж авах, эхийн сүүгээр хүүхдээ хооллохын туйлын ач холбогдлыг ойлгох, эхийн сүү муудах шалтгааныг даван туулах, хөхүүл эх эрүүл байхын тулд яах вэ, хүүхдэд нэмэгдэл хоолыг хэзээ, ямар хоолоор яаж өгөх вэ, хүүхдэд өгөх нэмэгдэл хоолыг яаж бэлтгэх, хүүхдийг яаж чийрэгжүүлэн, хөдөлгөөний дадалтай болгох вэ гэх мэт амьдралын чухал асуултуудад хариу өгөх юм. Хүүхдээ хөхүүлэх гэдэг дэлхийн болон монгол эхчүүдийн уламжлал мөн байгаад зогсохгүй хүүхэд хорвоод мэндэлж хүн болсны анхны хоол, хүн болох анхны хүмүүжил, хүнлэг сэтгэлийн эх ундрага болохын хувьд гэр бүлийнхний мэдвэл зохих мэдлэг учраас хүүхэд хөхүүлэх талаарх асуудлыг ихээхэн дэлгэрэнгүйгээр оруулж өгсөн болно.  

2 хүртэлх насны хүүхдийн хооллолт

2-10 насанд нь хүүхдийг зөв зохистой хооллож идэвхтэй хөдөлгөөнд дасгаж, бие махбодыг чийрэгжүүлбэл тухайн насандаа олон өвчнөөс сэргийлэх бөгөөд насанд хүрсэн хойно нь таргалалт, зүрх судасны өвчин, хорт хавдар, чихрийн шижин, цөсний өвчин зэрэг архаг өвчнөөс сэргийлэх эрт урьдчилан сэргийлэлт болдог гэж хоол судлаачид үздэг.   Эрдэмтэд, судлаачдын судалгаа шинжилгээний ажлын үр дүн, эмч нарын эмчилгээний арга туршлага, мэргэжлийн хүмүүсийн бичсэн олон бүтээл ном, өөрсдийн хийсэн судалгаа дүгнэлт, ажиглалт дээр тулгуурлан номын зохиогч М.Оюунбилэг 2-10 насны хүүхдийг зөв зохистой хооллох, тэдний хооллолтын болон хоол боловсруулалтын онцлог, хүүхдүүдэд хооллоход нь яаж туслан дэмжих, тэдэнд юу сургаж амьдралын дадал хэвшил болгох, энэ насны хүүхдийн дунд хооллолттой холбоотой тохиолддог өвчнөөс яаж сэргийлэх, хүнс хоолны эрүүл ахуйг яаж сахих, цэцэрлэг, сургуулийн хоолны үйлчилгээний талаар эцэг эх юу мэдэж, шаардаж байх, хүүхдийг өвчнөөс сэргийлэхийн тулд яаж чийрэгжүүлэх, хөдөлгөөний идэвхтэй болгоход яаж туслан дэмжих талаарх асуудлуудыг энэ номондоо багтаан бичсэн байна.  