Зүйр үг нь далд, гүнзгий утгатай учир түүнийг хүүхдийн хийж байгаа ажил, гаргаж байгаа зан ааш, хэлж байгаа үгтэй нь холбож тайлбарлахгүй маани шиг хэлэх юм бол хүүхэд шууд утгаар нь ойлгох буюу учрыг мэдэхгүй. Жишээ нь: хүүхэд гэрийн даалгавраа хийхгүй, тоглох буюу телевиз үзээд эхэлсэн үед 'Хүү минь ээ, 'Хойт хормойгоо авч, Урд хормойгоо нөхөх' гэсэн үг байдаг юм. Энэ нь эхлээд чухал юмаа хийгээд дараа нь чухал биш юмаа хий гэсэн үг. Чи минь сурч байгаа хүн болохоороо эхлээд гэрийн даалгавраа хийх, хичээлээ давтах ёстой. Бас энэ зүйр үг нь бусдад муухай, урд хормой нь уранхай, цоорхой хүн шиг харагдаж болохгүй гэсэн санаа.