Хүн ам бол улс орны оршин тогтнох хамгийн гол үндэс учраас аливаа улс орон, ялангуяа их гүрнүүд хүн амын бодлогыг төрийн бодлогынхоо эн тэргүүнд тавьдаг. Аж ахуйн нэг хэвшилтэй хүн амын бүлэг бүрдээд тэдгээр нь тодорхой эзэмшил газартай болж улмаар нийтлэг нэг хэлтэй, нэг соёлтой болсноор үндэстэн бүрэлддэг. Үндэстэн бий болсны дараа төр улсаа байгуулдаг. Энэ номонд XX зууны эхэн үеийн Монголын хүн амын тоо, бүтэц, бүрэлдэхүүн, байршил, ажил эрхлэлт, XX зууны эхний хагаст ямархуу байдалтай байсныг тодруулах, 1911 оноос хойш Монголын төрөөс хүн амын үндэсний зөв бодлого баримтлал бий болгох талаар хийсэн ажлуудыг уншигч олон түмэнд толилуулж байна. Ингэснээр цаашид Монголын төрөөс хүн амын талаар зөв тогтвортой, ул суурьтай бодлого боловсруулахад эрдэмтэд, судлаачид, сонирхогчид болон нийт иргэдийн анхаарал, оролцоог нэмэгдүүлэх зорилго тавьсан болно.