Бид хийгээд бидний өвөг дээдэс хүн төрөлхтний нэг хэсэг төдийгүй монгол угсаатан билээ. Тиймийн тул бидний монголчууд дэлхийн хүн зоны зөв ёсыг эрхэмлэхийн хамт, монгол ёс заншил, хэл бичиг, соёл түүхээ өвлөн тээж, уламжлагчид гэдгээ гүнээ ухамсарлаж, өнгөрсөн ба ирээдүйн өмнө хүлээх хариуцлагаа омтгойлж үл болно. Монгол улсын ерөнхийлөгч Ц.Элбэгдорж 2010 оны 5 дугаар сарын 21-нд 'Монголын уламжлалт сэтгэлгээ, арга билгийн ухааны үндэс' хичээлийг ЕБС-д албан ёсны хичээл болгон заах зарлиг гаргасан билээ. Иймд уг хичээлийг заагч, заалгагч хэн бүхэнд зүйл зүйлийн унших, лавлах ном хэрэгтэй бөгөөд мөнхүү тийм санал сэдлээр МУИС-ийн багш, доктор профессор Ш.Чоймаа энэхүү номоо бичиж нийтлүүлсэн байна.