Чи өнгө ялгаж мэдэх үү? Саарал хөшигтэй цонхны цаанаас саарал нар тусч, саарал вааранд яг л ийм өнгийн цэцэг ургана. Чи зөвхөн саарал өнгийн хувцас өмсөж, үс чинь буурал, царай чинь саарал байна гээд төсөөлөөд үз дээ! Бас хүүхдүүд саарал өнгийн тоглоомоор тоглож, зурсан зураг нь ч саарал байвал ямар уйтгартай санагдах бол? Хэрвээ бүх зүйл саарал бол ижилхэн савтай зүйлийг хараад ус, ундаа аль нь болохыг ялгаж чадахгүй шүү дээ. Тэгэхээр аливаа зүйлс өөр өөр өнгөтэй байх нь сайхан харагдахаас гадна, юмсыг ялгаж танихад тусалдаг байна.